भुसावळ रेल्वे स्थानकावर डिजिटल वेळापत्रक फलक पडले बंद; प्रवाशांची होतेय गैरसोय!

रेल्वे प्रवाशांची गैरसोय, डिजिटल फलकांवर रेल्वे गाड्यांच्या वेळापत्रका ऐवजी “Make in India” असा मजकूर झळकत आहे..

पोलीस वार्ता, भुसावळ : शहरातील भुसावळ रेल्वे स्टेशनच्या मुख्य प्रवेशद्वार परिसरात आमच्या सोयीसाठी बसविण्यात आलेले डिजिटल माहिती फलक सध्या बंद अवस्थेत आहे. यामुळे रेल्वे प्रवाशांची मोठी गैरसोय होत असल्याचे दिसत आहे. गाड्यांचे आगमन-प्रस्थान वेळापत्रक व उशिराची अचूक माहिती मिळावी या उद्देशाने हे डिजिटल बोर्ड रेल्वे विभागाकडून बसविण्यात आले होते.

मात्र तांत्रिक बिघाडामुळे संबंधित डिजिटल फलकांवर रेल्वे गाड्यांच्या वेळापत्रका ऐवजी “Make in India” असा मजकूर झळकत असल्याचे दिसून येत आहे. याचा परिणाम रेल्वे प्रवाशांना गाड्यांची अचूक माहिती मिळत नसल्याने रेल्वे स्थानकाच्या चौकशी खिडकीवर प्रवाशांची गर्दी पाहायला मिळत आहे.

भुसावळ रेल्वे स्टेशन हे मध्य रेल्वेचे एक महत्त्वाचे ठिकाण असून दररोज शेकडो प्रवासी या स्थानकावरून पुढे प्रवास करतात. अशा परिस्थितीत प्रवाशांना गाड्यांची माहिती न मिळणे, डिजिटल फलक कार्यरत नसणे या गंभीर बाब असून भुसावळ रेल्वे प्रशासनाने याची तात्काळ दखल घेऊन बंद डिजिटल बोर्ड पुन्हा चालू करावा अशी मागणी रेल्वे प्रवाशांकडून केली जात आहे. भुसावळ रेल्वे प्रशासनाकडून याबाबत आजुन कोणतीही अधिकृत प्रतिक्रिया मिळू शकली नाही.