शहर काँग्रेस कमिटीचा वणी नगरपरिषदेवर मोर्चा, नवीन मालमत्ता कर हुकुमशाही पद्धतीने लादल्याचा आरोप

वणी नगरपरिषदेने 2024-2025 या वर्षापासून वाढवलेल्या जादा मालमत्ता करवाढी विरोधात वणी काँग्रेस कमिटीच्या वतीने आवाज उठवण्यात आला आहे..

पोलीस वार्ता, वणी : राज्यात सर्वच महानगर आणि नगरपालिका, नगरपरिषदांच्या मालमत्ताकरांमध्ये गेल्या काही वर्षापासून वाढ होत असून लोकांना या आर्थिक बोज्याचा सामना करावा लागत आहे. राज्यात नगरपालिका, महानगरपालिका, नगरपरिषद यांमध्ये प्रशासक बसले असून सध्या नगरसेवक, लोकप्रतिनिधी नसल्याने सर्वसामान्यांचे प्रश्न कोण मांडणार असा प्रश्न जनतेसमोर आहे.

यवतमाळ जिल्ह्यातील वणी शहर नगरपरिषदेने देखील आपले नवीन मालमत्ता कर पूर्वीपेक्षा दुप्पटीने वाढवून जमा करण्यात सुरुवात केली आहे. नागरिकांना कर भरण्यासाठी नोटिसा देखील देण्यास सुरुवात केली असून अचानक वाढलेल्या या जादा मालमत्ता करामुळे नागरिक हताश होऊन वणी नगरपरिषदेवर रोष व्यक्त करत आहे.

वणी नगरपरिषदेने 2024-2025 या वर्षापासून वाढवलेल्या जादा मालमत्ता करवाढी विरोधात वणी काँग्रेस कमिटीच्या वतीने आवाज उठवण्यात आला आहे. नगरपरिषदेने कुठलाही ठराव न करता हे जादा कर आकारले असून पुढील चार वर्ष वणी करणार हे कर लागू राहतील त्यामुळे तत्काळ वाढीव कर रद्द करावे. यासाठी सोमवार दि.22 सप्टेंबर 2025 रोजी वणी नगरपरिषदेवर काँग्रेस कार्यकर्त्यांनी धडक मोर्चा काढला होता. यावेळी वणी काँग्रेस प्रदेश सचिव संजय खाडे यांच्या नेतृत्वात आंदोलन करून यवतमाळ जिल्हाधिकारी यांना मुख्याधिकारी यांच्या मार्फत निवेदन देण्यात आले.

निवेदनात म्हटले आहे की, नागरिक आधीच महागाई, वीजेचे वाढते दर, GST यांमुळे त्रस्त आहे. त्यात वणी नगरपरिषदेने वाढवले सक्तीचे कर, यासाठी नगरपरिषदेने कुठलीही समिती तयार केलेली नाही अथवा ठरवा करण्यात आलेला नाही. फक्त अधिकारी हुकुमशाही पद्धतीने असे निर्णय जनतेवर लादत आहे. त्यामुळे ही अवैध कर सक्ती रद्द करावी लागेल आणि वणीकरांना याला बळी पडू देणार नाही. वणी शहरात दोन-तीन वर्षांपासून अनियमित पाणीपुरवठ्याची समस्या कायम आहे. पावसाळ्यात देखील नागरिकांना पाण्यासाठी संघर्ष करावा लागतो. शहरातील खड्ड्यांचे रस्ते त्यात साचलेले पाणी, शहरातील घाणीचे साम्राज्य, वाढलेली झाडेझुडपे यासह वणी नगरपरिषदेने शहराच्या साफसफाईकडे केलेले दुर्लक्ष हे सर्व महत्त्वाचे विषय आहे. असे काँग्रेस नेते संजय खाडे यांनी म्हटले आहे. तसेच सक्तीचा जादा कर रद्द न केल्यास वणीतील नागरिकांसोबत घेऊन मोठे जनआंदोलन उभे केले जाईल. असा इशारा निवेदनातून काँग्रेसने दिला आहे.

यावेळी आंदोलन मोर्चात अशोक चिकटे, प्रफुल्ल उपरे, रामदास कुचनकर, संदीप कांबळे, रवी कोटावर, राजू डवरे, राजाभाऊ पाथ्रडकर, प्रेमनाथ मंगाम, कैलास पचारे, सुधीर खंडाळकर, कैसर पटेल, ओम ठाकूर, विकेश पानघाटे, अशोक पांडे, राजू अंकितवार, गणेश बोंडे, तोशीब अहमद, सुमित डवरे, विनीत तोडकर, संजय शेंडे आणि नरेंद्र काटोके आदी काँग्रेसचे पदाधिकारी व सदस्य उपस्थित होते.

✍️पोलीस वार्ता टीम : दिवाकर साखरकर, वणी (यवतमाळ)