पिंप्रीहाट येथील घटनेत आरोपींवर मोक्का व ॲट्रॉसिटी कायद्यानुसार गुन्हे दाखल करावे

आरोपींना तात्काळ अटक करून त्यांच्यावर मोक्का तसेच ॲट्रॉसिटी कायद्यानुसार गुन्हे दाखल करावे, रिपब्लिकन सेनेकडून ‘जळगाव जिल्हा बंद’ करण्याचा इशारा..

पोलीस वार्ता, भुसावळ : भडगाव तालुक्यातील पिंप्रीहाट येथे मागासवर्गीय कुटुंबावर झालेल्या हल्ल्याच्या प्रकरणी आरोपींवर कठोर कारवाई करावी. अशी मागणी जळगाव रिपब्लिकन सेनेच्या वतीने जिल्हा पोलीस अधीक्षक, जळगाव यांना निवेदन देऊन करण्यात आली आहे. कारवाई न झाल्यास रिपब्लिकन सेनेकडून ‘जळगाव जिल्हा बंद’ करण्याचा इशारा ही निवेदनात देण्यात आला आहे.

निवेदनात लिहिण्यात आले आहे की, 4 मार्च 2026 रोजी पिंप्रीहाट येथे घडलेल्या घटनेत आरोपींनी घरात घुसून मागासवर्गीय महिलांशी गैरवर्तन करत कुटुंबावर प्राणघातक हल्ला केला. या घटनेमुळे परिसरात भीतीचे वातावरण निर्माण झाले आहे. या प्रकरणातील आरोपींना तात्काळ अटक करून त्यांच्यावर मोक्का तसेच ॲट्रॉसिटी कायद्यानुसार गुन्हे दाखल करावेत, तसेच पीडित कुटुंबाला पोलीस संरक्षण देण्याचे निवेदनात नमूद केले आहे. निवेदनावर जळगाव रिपब्लिकन सेनेचे जिल्हाध्यक्ष विनोद सोनवणे आणि इतर पदाधिकाऱ्यांच्या स्वाक्षऱ्या केल्या आहेत.