दुर्दैवी! भुसावळ येथील दोन तरुणांचा लोणावळा पवना धरणात बुडून मृत्यू, शिवदुर्ग रेस्क्यू कडून मृतदेह दिले पोलिसांच्या ताब्यात..

लोणावळा ग्रामीण पोलिसांनी दिलेल्या माहितीनुसार, पुणे बालेवाडी येथील स्केन रियालिटी प्रायव्हेट लिमिटेड येथे नोकरीस असणारे आठ मित्र सकाळी मावळ तालुक्यात पर्यटनासाठी आले होते. ते दुपारी 12 वाजण्याच्या सुमारास लोणावळा हद्दीतील पवना धरण परिसरात फिरण्यासाठी गेले. यावेळी ते बोटीतून धरणाच्या पाण्यात उतरले असता बोट उलटल्याने मयूर व तुषार पाण्यात बुडाले. यावेळी त्यांच्या मित्रांनी त्यांना वाचविण्याचा प्रयत्न केला. मात्र येथील पाण्याची खोली जास्त असल्यामुळे त्यांचे प्रयत्न असफल ठरले. त्यांनी या घटनेची माहिती लोणावळा ग्रामीण पोलिसांना दिल्यानंतर शिवदुर्ग रेस्क्यू टीमच्या वतीने येथे बुडालेल्या तरुणांचा शोध घेवून दोघांचा मृतदेह लोणावळा ग्रामीण पोलीसांच्या ताब्यात दिला असून पोलीस स्टेशनला अकस्मात मृत्यूची नोंद करण्यात आली आहे. सदरील घटनेचा पुढील तपास लोणावळा ग्रामीण पोलीस स्टेशनचे हवालदार जय पवार करीत आहे. मृत तरुणांची अंत्ययात्रा दि.6 डिसेंबर रोजी सकाळी 7 वाजता त्यांचे राहत्या घरून वरणगांव रोडवरील, पद्मावती नगर येथून निघणार असल्याची माहिती नातेवाईकांनी दिली.