भुसावळ : शहरातील खडका चौफुलीजवळ ग्रीन व्ह्यू हॉटेल परिसरात देशी दारू दुकानाच्या शेजारी असलेल्या कचऱ्याच्या ढिगाऱ्यात शनिवारी एका अनोळखी इसमाचा मृतदेह आढळून आल्याने परिसरात खळबळ उडाली.
घटनेची माहिती डायल 112 वर प्राप्त होताच बाजारपेठ पोलिस ठाण्याचे पोलिस निरीक्षक राहुल वाघ यांच्या आदेशानुसार पोलिस कर्मचारी भरत गोराडकर, पंकज शेळके, परिष जाधव आणि हेमंत जांगडे यांनी तातडीने घटनास्थळी धाव घेतली. पंचनामा करून मृतदेह ताब्यात घेण्यात आला असून तो शवविच्छेदनासाठी शासकीय रुग्णालयात पाठविण्यात आला आहे.
मृताची ओळख अद्याप पटलेली नसून त्याचा मृत्यू नेमका कशामुळे झाला, याचा तपास पोलिसांकडून सुरू आहे. तसेच परिसरातील नागरिकांकडे चौकशी करून मृताची ओळख पटविण्याचे प्रयत्न सुरू असल्याची माहिती पोलिसांनी दिली.
