भुसावळ –शहरातील आगा खान वाडा,अहमद मेंबरच्या घराजवळ पाण्याची टाकी काढून टाकण्याच्या कारणावरून झालेल्या वादातून एका दाम्पत्यावर लोखंडी रॉडने हल्ला केल्याची घटना २४ फेब्रुवारी २०२६ रोजी सकाळी सुमारे ११ वाजता घडली. या प्रकरणी जखमी महिलेच्या फिर्यादीवरून संशयिताविरुद्ध गुन्हा दाखल करण्यात आला आहे.
फिर्यादी महिलेने दिलेल्या तक्रारीनुसार, ती आपल्या पती व मुलांसह वास्तव्यास असताना संशयित हुसेन शेख युसुफ हा त्यांच्या घरी आला. अंगणातील पाण्याची टाकी काढून टाकण्याच्या कारणावरून त्याने शिवीगाळ करत वाद घातला. टाकी हटवली नाही तर परिणाम भोगावे लागतील, अशी धमकीही दिल्याचे फिर्यादीत नमूद आहे.
वाद चिघळल्यानंतर संशयिताने लोखंडी रॉड उचलून फिर्यादीच्या पतीच्या डोक्यावर जोरदार प्रहार केला. त्यानंतर महिलेवरही रॉडने मारहाण करण्यात आली. या हल्ल्यात दोघेही जखमी झाले असून त्यांच्यावर प्रथम ट्रॉमा केअर सेंटर, भुसावळ येथे प्राथमिक उपचार करण्यात आले. पुढील उपचारासाठी त्यांना जळगाव येथील शासकीय रुग्णालयात हलविण्यात आल्याची माहिती आहे.
या घटनेप्रकरणी पोलिसांनी संबंधित कलमान्वये गुन्हा नोंद केला असून पुढील तपास सुरू आहे. आरोपीविरुद्ध कठोर कारवाईची मागणी परिसरातील नागरिकांकडून करण्यात येत आहे.
