भुसावळ : भुसावळ शहरातील आनंदनगर-नेप कॉलनी परिसरात शनिवारी (दि. २८ फेब्रुवारी) मध्यरात्री झालेल्या शाब्दिक वादातून एका व्यक्तीचा मृत्यू झाल्याची घटना उघडकीस आली आहे. अनिल उर्फ पिंटू आत्माराम सावकारे (वय ४२, रा. आनंदनगर-नेप कॉलनी) असे मृत व्यक्तीचे नाव आहे.
प्राथमिक माहितीनुसार, रात्री साधारण १ वाजेच्या सुमारास सावकारे यांच्यात त्याच परिसरातील एका तरुणाशी वाद झाला. वाद चिघळल्यानंतर झाडाची सिमेंटची कुंडी डोक्यावर मारण्यात आल्याचा आरोप आहे. या घटनेत सावकारे गंभीर जखमी झाले. त्यांना तातडीने उपचारासाठी हलविण्यात आले; मात्र त्यांचा मृत्यू झाल्याचे पोलिस सूत्रांनी सांगितले. मृत्यूचे नेमके कारण पोस्टमार्टम अहवालानंतर स्पष्ट होणार आहे.
घटनेची माहिती मिळताच उपविभागीय पोलीस अधिकारी केदार बारबोले, बाजारपेठ पोलीस स्थानकाचे पोलीस निरीक्षक राहुल वाघ, शहर पोलीस स्थानकाचे पोलीस निरीक्षक उद्धव डमाळे तसेच स्थानिक गुन्हे शाखेचे पथक घटनास्थळी दाखल झाले. पोलिसांनी पंचनामा करून पुरावे जप्त केले असून मृतदेह पुढील तपासणीसाठी पाठविण्यात आला आहे.
या घटनेमुळे परिसरात तणावाचे वातावरण निर्माण झाले असून पोलिसांनी परिस्थिती नियंत्रणात असल्याचे सांगितले. संबंधित कलमान्वये गुन्हा नोंद करण्याची प्रक्रिया सुरू असून पुढील तपास सुरू आहे.
