डॉ. बाबासाहेब आंबेडकर यांनी मुक्काम केलेल्या या बंगल्याला राज्य शासनाने जतन व संवर्धन करावे..
पोलीस वार्ता, नाशिक | महामानव डॉ.बाबासाहेब आंबेडकर सन 11 ऑक्टोबर 1935 साली नाशिक येथे आले होते. ते दोन दिवस नाशिकरोड येथील कार्यकर्त्यांना मार्गदर्शन करण्यासाठी डिस्टिलरी कॉटर्स येथील सार्वजनिक बांधकाम विभागाच्या ताब्यातील जुनी अस्वनी नावाच्या बंगल्यात थांबले होते. त्यानंतर दोन दिवसांनी येवल्यात दि.13 ऑक्टोबर रोजी डॉ.बाबासाहेबांनी धर्मांतराची इतिहासिक घोषणा केली होती.
नाशिकरोड येथील सन 1935 साली पासून ऐतिहासिक वास्तू ठरलेल्या, डॉ. बाबासाहेब आंबेडकर यांनी मुक्काम केलेल्या या बंगल्याला राज्य शासनाने जतन व संवर्धन करून ऐतिहासिक वास्तूचा दर्जा द्यावे. यासाठी सन 2023 रोजी डॉ.बाबासाहेब आंबेडकर स्मृतीस्थळे संवर्धन समिती स्थापन करण्यात आली असून या समितीच्या वतीने सातत्याने विभागीय आयुक्त, जिल्हाधिकारी नाशिक यांच्याकडे पाठपुरावा करत असून हा बंगला डॉ.बाबासाहेब आंबेडकरांचे स्मारक म्हणून घोषित करावा तसेच या ठिकाणी मोठे ग्रंथालय, पत्रकार भवन निर्माण करावे अशी मागणी केली जात आहे.
सामाजिक न्याय मंत्री मा.संजय शिरसाठ यांच्याकडे देखील निवेदन देऊन समितीने आपली मागणी शासन दरबारी न्यावी अशी मंत्री शिरसाठ यांना विनंती केली आहे. मंत्र्यांनी देखील समितीच्या मागणीला योग्य तो न्याय मिळवून देण्याचे आश्वासन दिले आहे. तसेच डॉ.बाबासाहेब आंबेडकरांच्या जीवन प्रवासातील पवित्र स्मृतींना, आठवणींना उजाळा देण्यासाठी, अभिवादन करण्यासाठी स्वतः मंत्री संजय शिरसाट हे येत्या दि.11 ऑक्टोबर 2026 रोजी सायं. 5 वाजता या ऐतिहासिक वास्तूला भेट देणार आहेत. यावेळी मंत्री महोदयांच्या उपस्थितीत अभिवादन सभेचे आयोजन करण्यात आले आहे.
