8 डिसेंबर रोजी कल्याण, भिवंडी, अंबरनाथ, मुरबाड, नगरपालिका बदलापूर व अंबरनाथ क्षेत्रात पल्स पोलिओ मोहीम राबविण्यात येणार..

मोहिमेचा उद्देश 0 ते 5 वर्षांखालील सर्व बालकांना पल्स पोलिओ लसीकरण करणे आहे. यामध्ये बालकांचे विहित वयात प्राथमिक लसीकरण..

पोलीस वार्ता, ठाणे | जिल्हा परिषद क्षेत्रात सार्वजनिक आरोग्य विभागाद्वारे 8 डिसेंबर 2024 रोजी रविवारी ठाणे ग्रामीण भागातील कल्याण, भिवंडी, अंबरनाथ, मुरबाड तसेच नगरपालिका बदलापूर व अंबरनाथ क्षेत्रात उपराष्ट्रीय पल्स पोलिओ मोहीम राबविण्यात येणार आहे. या मोहिमेचा उद्देश 0 ते 5 वर्षांखालील सर्व बालकांना पल्स पोलिओ लसीकरण करणे आहे. यामध्ये बालकांचे विहित वयात प्राथमिक लसीकरण, नियमित एएफपी सर्व्हेक्षण आणि पल्स पोलिओ लसीकरण समाविष्ट आहे, ज्याद्वारे सर्व बालकांना पोलिओच्या संसर्गापासून संरक्षित करण्यात येईल.

राज्यात 1995 पासून दरवर्षी पल्स पोलिओ मोहीम राबवली जात आहे. ठाणे जिल्हा परिषदच्या सार्वजनिक आरोग्य विभागांतर्गत कार्यरत सर्व आरोग्य केंद्रांमध्ये ही लस मोफत उपलब्ध केली आहे. त्यामुळे पालकांनी 0 ते 5 वर्षांपर्यंतच्या सर्व बालकांना या लसीकरणाचा लाभ घ्यावा, असे आवाहन जिल्हा परिषदेचे मुख्य कार्यकारी अधिकारी रोहन घुगे आणि जिल्हा आरोग्य अधिकारी डॉ.गंगाधर परगे यांनी केले आहे.

ग्रामीण भागातील 0 ते 5 वर्षांखालील एक लाख 8 हजार 724 बालकांना तर बदलापूर व अंबरनाथ नगरपालिका क्षेत्रातील 68 हजार 833 बालकांना पल्स पोलिओ लस देण्याचे नियोजन ठाणे जिल्हा परिषद सार्वजनिक आरोग्य विभागाने केले आहे. या लसीकरण मोहिमेचा आयोजन ठाणे जिल्हा परिषद क्षेत्रातील एकूण 1 हजार 403 बूथवर करण्यात येणार आहे. यासाठी ठाणे जिल्हा परिषदेचे 3 हजार 440 कर्मचारी कार्यरत असतील. मागील मोहिमेत ठाणे जिल्हा परिषद क्षेत्रात 0 ते 5 वर्षे वयातील 1 लाख 40 हजार 92 बालकांना लस देण्यात आली होती.

✍️पोलीस वार्ता प्रतिनिधी: दिनेश पाटील, ठाणे संपर्क: 8097983334