भोर (संतोष मोहिते) पुणे-सातारा महामार्गावरील धांगवडी (ता. भोर) येथे अडबलसिद्धनाथ देवाच्या यात्रेनिमित्त गाडे-बगाड पाहण्यासाठी भाविकांची मोठी गर्दी उसळली होती. भोर आणि राजगड (वेल्हे) तालुक्यांच्या सीमेवर असलेल्या या यात्रेला दरवर्षीप्रमाणे यंदाही उत्स्फूर्त प्रतिसाद मिळाला.
चैत्र शुद्ध पौर्णिमा व हनुमान जयंतीच्या दिवशी, गुरुवार दि 2 एप्रिल सायंकाळी गाडे-बगाडाचा पारंपरिक खेळ उत्साहात पार पडला. निगडे गावातील महाकाली देवीची काठी-पालखी धांगवडीतील विठ्ठल-रखुमाई मंदिरासमोर आल्यानंतर या सोहळ्याला सुरुवात झाली. निगडे गावातील मंडळाचे कार्यकर्ते आणि महिला बैलगाड्या व ट्रॅक्टरमधून धांगवडी येथे दाखल होण्याची परंपरा आजही कायम आहे. वाद्यांच्या गजरात गाडे-बगाड अडबलसिद्धनाथ मंदिरासमोर आणण्यात आला, ज्यामुळे संपूर्ण परिसर भक्तिमय वातावरणाने भारावून गेला.यात्रेची सुरुवात शिंदेवाडी (ता. खंडाळा, जि. सातारा) येथील पांडवदरा डोंगरावरील देवांची पालखी अडबलसिद्धनाथ मंदिरात आणून करण्यात आली होती. त्यानंतर आठ दिवस विविध धार्मिक कार्यक्रमांनी यात्रेला अधिकच रंगत आणली.
