भुसावळ, ता. १५ : सावकारी व्यवसायासाठी परवाना काढून देण्याच्या मोबदल्यात ३० हजार रुपयांच्या लाचेची मागणी केल्याप्रकरणी सहाय्यक निबंधक कार्यालयातील सहकार अधिकारी व दोन प्रमाणित लेखापरीक्षकांविरुद्ध लाचलुचपत प्रतिबंधक विभागाने कारवाई केली आहे.
तक्रारदार यांनी सावकारी व्यवसायासाठी परवाना मिळविण्यासाठी सहाय्यक निबंधक, सहकारी संस्था कार्यालय, भुसावळ येथे अर्ज केला होता. परवाना मंजूर करून देण्यासाठी सहकार अधिकारी विजय विनायकराव गरुड राहणार धुळे (वर्ग -३) यांनी २० हजार रुपये, तर प्रमाणित लेखापरीक्षक सुरेश जानार्दन विसपुते वय -६२ राहणार माऊली नगर,रेणुका माता मंदिर जवळ ,राजस्थान मार्बल पाठीमागे भुसावळ आणि प्रमाणित लेखापरीक्षक हेमंत प्रकाश काळे वय-४० राहणार ६१ विवेकानंद नगर,जिल्ह्या पेठ जळगांव यांनी प्रत्येकी ५ हजार रुपये, अशी एकूण ३० हजार रुपयांच्या लाचेची मागणी केल्याची तक्रार लाचलुचपत प्रतिबंधक विभागाकडे करण्यात आली होती.
तक्रारीची पडताळणी केल्यानंतर १५ जून रोजी भुसावळ येथील नाहाटा चौफुली परिसरात सापळा रचण्यात आला. यावेळी सुरेश विसपुते यांनी हेमंत काळे यांच्याशी फोनवर बोलून लाचेची रक्कम स्वीकारण्याबाबत चर्चा केली. त्यानंतर तक्रारदारांकडून ३० हजार रुपयांची रक्कम स्वीकारण्यास सहमती दर्शविल्याचे निष्पन्न झाले.
या प्रकरणी विजय विनायकराव गरुड (सहकार अधिकारी), सुरेश जानार्दन विसपुते (प्रमाणित लेखापरीक्षक) आणि हेमंत प्रकाश काळे (प्रमाणित लेखापरीक्षक) यांच्याविरुद्ध भ्रष्टाचार प्रतिबंधक अधिनियमांतर्गत गुन्हा दाखल करण्याचे काम सुरू असल्याची माहिती लाचलुचपत प्रतिबंधक विभागाने दिली.याप्रकरणी दोन संशयितांना ताब्यात घेण्यात आले असून पथक तिसऱ्या संशयितास घेण्यासाठी धुळे येथे वरिष्ठांच्या आदेशावरून पाचारण करण्यात आले आहे.
कारवाई पोलीस उपअधीक्षक हेमंत नागोरे यांच्या मार्गदर्शनाखाली लाचलुचपत प्रतिबंधक विभाग, जळगावच्या पथकाने केली.
