महाराष्ट्रासाठी भाजपने दोन निरीक्षकांची नियुक्ती केली, कोणाला दिली काय जबाबदारी?

महाराष्ट्रात विधानसभा निवडणुकीत मिळालेल्या मोठ्या विजयानंतर नव्या NDA सरकारचा आता येत्या 5 डिसेंबरला शपथविधी पार पडणार आहे.

पोलीस वार्ता, मुंबई | भारतीय जनता पार्टीने मंगळवारी केंद्रीय अर्थमंत्री निर्मला सीतारामन आणि गुजरातचे माजी मुख्यमंत्री विजय रुपाणी यांची महाराष्ट्रातील पक्ष विधिमंडळ पक्षनेत्याच्या निवडीसाठी केंद्रीय निरीक्षक म्हणून नियुक्ती केली आहे. भाजपचे सरचिटणीस अरुण सिंह यांनी याबाबत एक निवेदन जारी केले, ज्यामध्ये सांगितले की, “पक्षाच्या संसदीय मंडळाने विजय रुपाणी आणि निर्मला सीतारामन’ यांना महाराष्ट्रातील पक्ष विधिमंडळ पक्षनेत्याच्या निवडीसाठी केंद्रीय निरीक्षक म्हणून नियुक्त केले आहे.

निवडणूक निकाल जाहीर होऊन आठवडा उलटून गेला तरी महाराष्ट्रात नवीन सरकार स्थापन झालेले नाही. नव्या मुख्यमंत्र्यांच्या निवडीबाबत भाजपच्या निर्णयाला आपला पाठिंबा असल्याचे काळजीवाहू मुख्यमंत्री एकनाथ शिंदे यांनी सांगितले. त्यांच्या या घोषणेनंतर महाराष्ट्राचा पुढील मुख्यमंत्री भाजपचाच होणार हे जवळपास स्पष्ट झाले आहे.

3 डिसेंबरला पक्षाच्या विधिमंडळ पक्षाची बैठक होऊ शकते, असे भाजपच्या सूत्रांचे म्हणणे आहे.