खिरोदा येथील धनाजी नाना विद्यालयात 36 हजारांची लाच घेताना मुख्याध्यापिका व क्लर्क धुळे एसीबीच्या जाळ्यात..

ही धक्कादायक घटना खिरोदा येथील जनता शिक्षण मंडळ संचलित, धनाजी नाना विद्यालयात घडली.. मुख्याध्यापिका मनीषा महाजन व कनिष्ठ लिपिक आशिष यशवंत पाटील ही लाचखोरांची नावे..

पोलीस वार्ता, भुसावळ : जळगाव जिल्ह्यातील खिरोदा येथे विद्यालयातील उपशिक्षिका असलेल्या महिलेची प्रसुती रजा मंजूर करून देण्यासाठी मुख्याध्यापिका आणि कनिष्ठ लिपिक यांनी 36 हजाराच्या लाचेची मागणी केली होती. आणि ती स्वीकारताना धुळे लाचलुचपत पथकाने (एसीबी) सोमवारी, सायंकाळी दि.7 जुलै 2025 रोजी त्यांना अटक केली आहे. या घटनेने शैक्षणिक क्षेत्रात चिंतेचे वातावरण निर्माण झाले आहे. या भ्रष्टाचाराला काय समजावे?

ही धक्कादायक घटना खिरोदा येथील जनता शिक्षण मंडळ संचलित, धनाजी नाना विद्यालयात घडली असून मुख्याध्यापिका मनीषा पितांबर महाजन, वय-57, रा. चिनावल रोड, खिरोदा तसेच कनिष्ठ लिपिक आशिष यशवंत पाटील, वय-27, रा. उदळी, ता.रावेर अशी दोघा लाचखोरांची नावे आहेत.

याच संस्थेतून सेवानिवृत्त झालेले मुख्याध्यापक या प्रकरणात तक्रारदार असून त्यांच्या सुनबाई ह्या देखील याच विद्यालयात उपशिक्षिका म्हणून कार्यरत आहे. त्यांच्या सूनबाईला प्रसुती रजा मिळण्यासाठी त्यांनी 2 जून 2025 रोजी संबंधित मुख्याध्यापिका यांच्याकडे रितसर अर्ज केला होता. त्यानंतर तक्रारदार यांनी त्यांच्या सूनबाईच्या सांगण्यावरून मुख्याध्यापिका मनीषा महाजन यांची भेट घेतली. तेव्हा त्यांना सूनबाईच्या प्रसुती रजा मंजूर करून देण्यासाठी प्रती महिना 5 हजार प्रमाणे असे सहा महिन्यांचे एकूण 30 हजार रुपये लाच स्वरूपात मागण्यात आले.

त्यानंतर तक्रारदार यांनी दि.7 जुलै 2025 रोजी तक्रार दिल्याप्रमाणे लाचलुचपत पथकाने पडताळणी करून लाचेची 36 हजार रुपये रक्कम स्वीकारताना कनिष्ठ लिपिक आणि मुख्याध्यापिका यांना अटक केली आहे. दोघा आरोपींविरोधात सावदा पोलीस ठाण्यात गुन्हा दाखल करण्यात आला आहे. सदरची कारवाई धुळे एसीबी पथकाचे पोउपअधी. सचिन साळुंखे यांच्या नेतृत्वात पोनि. रुपाली खांडवी, पोह. राजन कदम, मुकेश अहिरे, पावरा, पोकॉ. रामदास बारेला, पोचा. मोरे, बडगुजर यांच्या पथकाने मिळून केली.

✍️पोलीस वार्ता संपादक: निलेश फिरके, भुसावळ, संपर्क: 09960333469