अज्ञातांनी बिल्डींगच्या कम्पाऊंडमध्ये प्रवेश करून दरवाजावर जोरजोरात लाथा मारून खिडकीच्या काचा व जाळी तोडुन घरासमोरील कुंडी तसेच मोठी फरशी स्टाईल दरवाजावर मारून दहशत केली..
पोलीस वार्ता, नाशिक : शहर परिसरातील चोरी, घरफोड्या तसेच गुन्ह्यातील फरार सराईत गुन्हेगारांचा तपास करून कारवाई करण्याचे आदेश नाशिक शहर पोलीस आयुक्त श्री. संदिप कर्णिक साहेब यांनी शहर पोलीस प्रशासनाला दिले आहेत.
त्यानुसार अंबड पोलीस ठाणे येथे दि.28 मार्च 2025 रोजी दाखल झालेल्या गुरनं- 309/2025 या गुन्ह्याचा तपास नाशिक शहर पोलीस गुन्हेशाखा युनिट-2 कडून करत असताना माहिती मिळाली की, अंबड पोलीस ठाणे हद्दीत दि.28 मार्च 2025 रोजी पहाटे 3.30 वाजेच्या सुमारास तक्रारदार घरी परिवारासह झोपलेले असतांना अज्ञातांनी जुन्या वादाचा राग मनात धरून त्यांच्या बिल्डींगच्या कम्पाऊंडमध्ये प्रवेश करून त्यांच्या दरवाजावर जोरजोरात लाथा मारून खिडकीच्या काचा व जाळी तोडुन घरासमोर असलेल्या कुंडी तसेच मोठी फरशी स्टाईल दरवाजावर मारून दहशत निर्माण केली. तसेच घरातील लोकांच्या जिवितास धोक्यात आणले अशी तक्रारदार यांनी फिर्याद दिल्यावर अंबड पोलीस ठाण्यात गुरनं- 309/2025 भा.न्या.सं कलम 110, 333 324/4 3(5) प्रमाणे गुन्हा दाखल झाला होता.
या गुन्ह्यातील चार अनोळखी आरोपींचा दि.27 मे 2025 रोजी नाशिक शहर पोलीस गुन्हेशाखा युनिट-2 कडून शोध घेत असतांना पोह. चंद्रकांत गवळी यांना माहिती मिळाली की, शोध घेत असलेले चार अनोळखी आरोपींची नावे ‘अशी’ असून ते त्यांच्या राहत्या घराच्या परीसरात वावरत आहेत. मिळालेली माहिती त्वरित गुन्हेशाखा युनिट-2 चे सपोनि. हेमंत तोडकर यांना कळविली आणि त्यांच्या मार्गदर्शनात श्रेणी पोउपनि मुक्तारखान पठाण, पोह. नंदकुमार नांदुर्डीकर, चंद्रकांत गवळी, मनोज परदेशी, प्रकाश बोडके, अतुल पाटील, पोअं. प्रविण वानखेडे, जितेंद्र वजीरे यांचे पोलीस पथक तयार करून संशयित आरोपींच्या घरांच्या परीसरात शोध घेत त्यांना हुशारीने ताब्यात घेण्यात आले. त्यांची नावे व माहिती विचारली असता 1) रोहीत उर्फ मोडया राजेंद्र सुर्यवंशी, (वय 22) रा. सिध्दी रो.हाऊस नं-3, सेंट लॉरेन्स शाळेसमोर, समर्थनगर, सिडको, नाशिक. 2) भरत सुदाम साळवे, (वय 19) रा. भुमिका अपार्ट, वॉचमन रूम, सिटी गार्डनचे पाठीमागे, इंदिरानगर, नाशिक. 3) अनुज उर्फ करण प्रकाश देवरे, (वय 21) रा. श्रीजी रो.हाऊस नं-3, माउंट अॅन्ड ड्यू, हॉटेलचे मागे, पांडवलेणी जवळ, इंदिरानगर, नाशिक. 4) ऋतिक उर्फ रिंकु रामराव हिरे (वय 25), रा. केसुनिवास, फ्लॅट नं-3, रामेश्वर नगर, आनंद लॉन्ड्री जवळ, गंगापुर रोड, नाशिक. असे त्यांनी सांगीतले. गुन्ह्यासंबंधी चौकशी केली असता त्यांनी कबुली दिल्याने त्यांना पुढील कारवाईसाठी अंबड पोलीस ठाणे अंतर्गत MIDC पोलीस चौकीत हजर करण्यात आले आहे.
