विधानसभा निवडणूक 2024: महाराष्ट्र आणि झारखंड निवडणुकीच्या तारखा आज जाहीर होणार..

निवडणूक आयोग आज दुपारी 3.30 वाजता पत्रकार परिषद आयोजित करणार आहे. रिक्त झालेल्या तीन लोकसभा आणि किमान 47 विधानसभा जागांसाठी निवडणूक जाहीर करू शकतात.

नवी दिल्ली | महाराष्ट्र आणि झारखंडमधील विधानसभा निवडणुकीच्या तारखा आज जाहीर करणार आहेत. निवडणुकीशी संबंधित सविस्तर माहिती जाहीर करण्यासाठी निवडणूक आयोग आज दुपारी 3.30 वाजता पत्रकार परिषद आयोजित करणार आहे.

महाराष्ट्र विधानसभेचा कार्यकाळ 26 नोव्हेंबरला आणि झारखंड विधानसभेचा कार्यकाळ पुढील वर्षी 5 जानेवारीला संपणार आहे. विधानसभा निवडणुकांव्यतिरिक्त, निवडणूक आयोग विविध कारणांमुळे रिक्त झालेल्या तीन लोकसभा आणि किमान 47 विधानसभा जागांसाठी पोटनिवडणूक जाहीर करू शकतात. लोकसभेच्या ज्या 3 जागा रिक्त आहेत त्यात केरळातील वायनाड, महाराष्ट्रातील नांदेड आणि पश्चिम बंगालमधील बसीरहाट या जागेंचा समावेश आहे.

 लोकसभा निवडणुकीत काँग्रेस नेते राहुल गांधी वायनाड आणि रायबरेली मतदारसंघातून विजयी झाले होते. राहुल गांधींनी वायनाडची जागा सोडली होती आणि रायबरेलीची जागा राखली होती. नांदेड मतदारसंघाचे प्रतिनिधीत्व करणारे काँग्रेसचे खासदार वसंत चव्हाण आणि बशीरहाट मतदारसंघाचे प्रतिनिधीत्व करणारे तृणमूल काँग्रेसचे खासदार हाजी शेख नुरुल इस्लाम यांच्या नुकत्याच झालेल्या निधनानंतर या जागांवर निवडणुका घेणे आवश्यक झालेले आहे.

पोलीस वार्ता संपादक : उमेश फिरके,नाशिक