भुसावळ : शहरातील वाल्मीक नगर येथील एचडीएफसी बँकेसमोर एका तरुणाला १० ते १२ जणांच्या टोळक्याने बेदम मारहाण केल्याची घटना मंगळवारी (दि. २९) दुपारी सुमारे १ वाजता घडली. याप्रकरणी हर्षल येवले (रा. किन्ही, ता. भुसावळ) याच्यासह त्याच्या इतर साथीदारांविरुद्ध गुन्हा दाखल करण्यात आला आहे.
फिर्यादीनुसार, चुलत भाऊ मोहित पाटील याने एका तरुणीची मजाक केल्याच्या संशयावरून आरोपींनी मोहित पाटील कुठे आहे, अशी विचारणा केली. त्यानंतर फिर्यादीला फायटर, हातातील कडे तसेच लाथाबुक्क्यांनी मारहाण केली. या मारहाणीत फिर्यादीला चावाही घेण्यात आल्याने तो जखमी झाला. आरोपींनी घटनास्थळावरून पळ काढताना फिर्यादीला जीवे मारण्याची धमकी दिल्याचेही तक्रारीत नमूद करण्यात आले आहे.
या प्रकरणी बाजारपेठ पोलीस ठाण्यात जगदीश दिलीप पाटील यांनी दिलेल्या फिर्यादीवरून ता.२९ जुलै रोजी हर्षल येवले व त्याच्या इतर १० ते १२ साथीदारांविरुद्ध गुन्हा दाखल करण्यात आला असून पुढील तपास सुरू आहे.
