भुसावळ – शहरातील रेल्वे स्टेशन परिसरातील छत्रपती शिवाजी महाराज पुतळ्याजवळून मोटारसायकलवरून रेल्वे स्थानकाकडे जात असताना भोपाल (मध्यप्रदेश) येथील अशपाक कुरेशी यांचे सुमारे एक तोळ्याचा सोन्याचा हार व ३ ग्रॅम वजनाच्या कानातील रिंग रस्त्यात पडून हरवल्या होत्या. दागिने हरवल्याची बाब लक्षात येताच त्यांनी बाजारपेठ पोलीस ठाण्यात धाव घेऊन तक्रार दिली.
तक्रारीची दखल घेत पोलीस निरीक्षक राहुल वाघ यांच्या मार्गदर्शनाखाली पी.एस.आय.भारती काळे,गुन्हे शोध पथकातील विजय नेरकर,कांतीलाल केदारे,योगेश माळी, हर्षल पाटील,अक्षय कोतकर व तोसीफ शेख,सिमा चौधरी, यांनी तत्काळ शोधमोहीम सुरू केली.पोलिसांनी रेल्वे स्टेशन परिसरातील सीसीटीव्ही फुटेजची तपासणी केली असता एक रिक्षाचालक सोन्याचे दागिने उचलताना दिसून आला.
त्यानंतर तांत्रिक विश्लेषणाच्या आधारे संबंधित रिक्षाचालकाचा शोध घेण्यात आला. त्याला पोलीस ठाण्यात बोलावून चौकशी केली असता त्याने दागिने सापडल्याची कबुली दिली व मिळालेला मुद्देमाल पोलिसांच्या स्वाधीन केला.
पोलीस निरीक्षक राहुल वाघ यांच्या आदेशानुसार सोन्याचा हार व कानातील रिंग मूळ मालक अशपाक कुरेशी यांच्या ताब्यात देण्यात आल्या. पोलिसांच्या तत्परतेमुळे हरवलेले दागिने परत मिळाल्याने तक्रारदारांनी बाजारपेठ पोलिसांचे आभार मानले.
