भुसावळ – येथील संत गाडगे महाराज नगरपालिका रुग्णालय येथे डॉक्टरांनी आपल्या टेबलापासून चक्क दोरी बांधली असून तपासणी साठी आलेल्या रुग्णांना अक्षरशः तीन ते चार फूट अंतरावर डॉक्टर उभे करीत तपासणी करीत असल्याची तक्रार सामाजिक तथा माहिती अधिकार कार्यकर्ते केदारनाथ सानप यांना मौखिक स्वरूपात लोकांनी केली होती.
या संदर्भात बर्याच दिवसांपासून परिसरातील रूग्णांच्या तक्रारी येत होत्या. याबाबत शहानिशा करण्याकरीता केदारनाथ सानप हे स्वतः रूग्ण बनून ता.२३ ऑक्टोबर रोजी नगरपालिका रूग्णालयात गेले होते.तेथे रितसर केसपेपर काढून तब्बेत खराब असल्याचे सांगत संबंधित डॉ.उज्ज्वला भंगाळे यांच्याकडे गेले असता रूग्णांच्या आलेल्या तक्रारीनुसार खरोखरच त्या ठिकाणी डॉक्टरांच्या टेबलापासून जवळपास तीन ते चार फुट अंतरावर दोरी बांधण्यात आली होती. या दोरी पलिकडूनच त्या रूग्णांची तपासणी करित होत्या. तशीच तपासणी केदारनाथ सानप यांची देखील केली व केवळ त्यांनी सांगितल्या नुसार त्यांना हात न लावता अथवा कोणत्याही प्रकारे न तपासता औषधी लिहून दिली. यावेळी श्री.सानप यांनी डॉक्टरांना या दोरीबाबत विचारले असता येथे वेगवगळ्या आजाराचे पेशंट येतात.यात टीबीसारख्या रोगाचेही पेशंट असतात याबाबत तुम्ही बाबुजीशी बोला अथवा मुख्य वैद्यकिय अधिकारी डॉ.किर्ती फलटणकर यांच्याशी बोला असे सांगितले.मात्र यावेळी त्या उपस्थित नसल्याने बाबुजींशी बोलले असता त्यांनी ताबडतोब दोरी काढण्याचे आदेश कर्मचार्यांना सानप यांच्या समोर दिले.मात्र यापुढे असा कुठलाही प्रकार पुन्हा होवू नये अथवा रूग्णांच्या जीवाशी डॉक्टरांनी खेळू नये,याकरिता याबाबत मुख्याधिकारी तसेच जिल्हाधिकारी यांच्याकडे तक्रार करणार असल्याचे सामाजिक तथा माहिती अधिकार कार्यकर्ते केदारनाथ सानप यांनी सांगितले.
