भुसावळ, ता.१ : (निलेश.के.फिरके) शहरातील वरणगाव रोड परिसरात गंभीर स्वरूपाचा गुन्हा करण्याच्या उद्देशाने दोन तरुणांनी सार्वजनिक ठिकाणी गावठी शस्त्रे लपवून ठेवल्याचा धक्कादायक प्रकार उघडकीस आला आहे.या प्रकरणी बाजारपेठ पोलिसांनी तत्पर कारवाई करत एकास अटक केली असून दुसरा आरोपी फरार झाला आहे.
मिळालेल्या माहितीनुसार, वरणगाव रोडवरील आलीशान वॉटर पार्कच्या मागील भागात झाडाझुडपांमध्ये दोन गावठी पिस्टल व एक गुप्ती लपवून ठेवण्यात आल्याची गोपनीय माहिती बाजारपेठ पोलीस ठाण्याचे निरीक्षक राहुल वाघ यांना मिळाली होती. माहितीच्या आधारे त्यांनी तात्काळ गुन्हे शोध पथकाला कारवाईचे आदेश दिले.
पथकातील विजय नेरकर,कांतीलाल केदारे,चंद्रकांत रायपूरकर, योगेश माळी,सचिन चौधरी,अक्षय कोतकर,भूषण चौधरी,महेंद्र पाटील, जावेद शहा व जीवन कापडे यांनी संशयितांना ताब्यात घेत घटनास्थळी धाव घेतली.यावेळी संशयिताने पोलिसांना लिंबाच्या झाडाजवळ नेऊन झाडाच्या बुंध्याशी पाळापाचोळ्यात लपवून ठेवलेली दोन गावठी पिस्टल व एक गुप्ती दाखवून दिली.
या कारवाईत पोलिसांनी सुमारे ७१ हजार रुपये किंमतीचा मुद्देमाल जप्त केला आहे. याप्रकरणी भूषण शांताराम कोळी (वय १९, रा. पाडळसा, ता. यावल) यास अटक करण्यात आली असून त्याचा साथीदार गोलू जैन (रा. साकेगाव) हा फरार असून त्याचा शोध सुरू आहे.
भूषण चौधरी यांनी दिलेल्या फिर्यादीवरून बाजारपेठ पोलीस ठाण्यात गुन्हा दाखल करण्यात आला आहे. पुढील तपास पोलीस कर्मचारी कांतीलाल केदारे करीत आहेत.
