कायदा व सुव्यवस्था अबाधित ठेवण्यासाठी तसेच शहरात सर्व सण शांततेत साजरे होण्याच्या दृष्टीने वणी पोलिसांचा रूट मार्च..
पोलीस वार्ता, यवतमाळ : वणी शहर व तालुका परिसरात कायदा व सुव्यवस्था अबाधित ठेवण्यासाठी तसेच शहरात सर्व सण शांततेत साजरे होण्याच्या दृष्टीने वणी पोलिसांनी गणेशोत्सव व ईद-ए-मिलाद या सणांच्या पार्श्वभूमीवर शहरात मंगळवार दि.26 ऑगस्ट 2025 रोजी सायंकाळी 5 वाजेच्या सुमारास शहरातील टिळक चौक येथे पोलिसांनी दंगा काबू प्रात्यक्षिक केले. तसेच शहरातील शासकीय मैदानावर दि.28 ऑगस्ट 2025 रोजी, सकाळी 11:30 वाजता पोलिसांचे दंगा नियंत्रण प्रात्यक्षिक (Mock Drill) करण्यात आले. त्यानंतर वणी शहरातील प्रमुख मार्गांवरून वस्तीतून रूट मार्च काढण्यात आला.
या प्रात्यक्षिकात सहभागी होऊन उपविभागातील शिरपूर, पाटण, मुकुटबन, मारेगाव पोलीस ठाण्याचे पो.अधिकारी, कर्मचारी व होमगार्ड भाग घेतला. दंगा नियंत्रण वेळी जमावाला पांगवण्यासाठी लागणाऱ्या विविध कृती आणि साधनांचे प्रात्यक्षिक यावेळी दाखवण्यात आले. यवतमाळ पोलीस मुख्यालयातील कवायत निर्देशक सपोफौ. बाबुसिंग राठोड, पोहेकॉ. श्रीकांत जयस्वाल, मपोहेकॉ. अर्चना सुपारे, मपोकॉ. पुजा जुमनाके यांनी सर्व प्रात्यक्षिकाचे मार्गदर्शन याप्रसंगी केले.
प्रात्यक्षिकामध्ये लाठी, हेल्मेट, शिल्ड, गॅस गन, गॅस ग्रेनेड, पंप ॲक्शन गन, एस.एल.आर. रायफल, अश्रू शेल, लाँग रेंज शेल, स्टन शेल, वूड पियर्सिंग सेल, डाय मार्कर सेल अश्या पोलीस उपयोगी शस्त्रांची माहिती देण्यात आली. यावेळी वणी उपविभागीय पोअधि. मा.सुरेश दळवे, वणी पोनि. गोपाल उंबरकर उपस्थित होते. प्रात्यक्षिकामुळे पोलिसांमध्ये ऊर्जा वाढेल व शहरात कायदा व शांतता राखण्यास पोलिसांना मदत होईल, असा विश्वास अधिकाऱ्यांनी व्यक्त केला आहे.
