भुसावळ : अमरावती जिल्ह्यातील दत्तापूर पोलिस ठाण्यात दाखल असलेल्या गुन्ह्यातील २० वर्षीय संशयिताला भुसावळ शहरातील वाल्मीक नगर परिसरातून दत्तापूर पोलिसांच्या पथकाने ताब्यात घेतले. याबाबत भुसावळ बाजारपेठ पोलिस ठाण्यात २४ सप्टेंबर रोजी रात्री ९.२८ वाजता नोंद करण्यात आली आहे.
दत्तापूर पोलिस ठाण्यात गुन्हा क्रमांक ३०२/२०२६ दाखल असून, भारतीय न्याय संहितेतील कलम ७४, ७८, ७९ तसेच माहिती तंत्रज्ञान कायद्यातील कलम ६७ अंतर्गत कारवाई सुरू आहे. या प्रकरणात महिला अत्याचार, महिलेचा पाठलाग करणे, अश्लील शिवीगाळ करणे आदी आरोपांशी संबंधित कलमे लावण्यात आली आहेत. या प्रकरणातील संशयित नकुल विनोद कल्याणे (वय २०, रा. वाल्मीक नगर, भुसावळ) हा भुसावळ येथे असल्याची माहिती दत्तापूर पोलिसांना मिळाली.
त्यानुसार पोलीस उपनिरीक्षक गणेश कावळे, पोलीस कर्मचारी सोनू भालेराव, धीरज इंगळे तसेच माहितीगार पोलीस कर्मचारी प्रकाश दांडगे यांच्या पथकाने भुसावळ गाठून वाल्मीक नगर परिसरात शोध घेतला. यावेळी संशयित मिळून आल्याने त्याला पोलिसांनी ताब्यात घेतले. त्याच्या कुटुंबीयांना गुन्ह्याची माहिती देण्यात आली.
त्यानंतर दत्तापूर पोलिस अधिकारी व कर्मचारी संशयितासह भुसावळ बाजारपेठ पोलिस ठाण्यात आले. पुढील कायदेशीर कारवाईसाठी संशयिताला दत्तापूर पोलिस ठाणे, जिल्हा अमरावती येथे नेण्यात आल्याची नोंद पोलिस दप्तरी करण्यात आली आहे.
दरम्यान, या प्रकरणातील आरोपांची सत्यता न्यायालयीन प्रक्रियेत निश्चित होणार असून, संशयितावरील आरोप अद्याप सिद्ध झालेले नाहीत.
