भुसावळ (क्राईम रिपोर्टर): शहरातील गजबजलेल्या भुसावळ बाजारपेठ परिसरात भरदिवसा एका व्यापाऱ्याची जवळपास दोन लाख रुपयांची रोकड असलेली बॅग अज्ञात चोरट्याने पळवल्याची खळबळजनक घटना उघडकीस आली होती. मात्र, पोलिसांनी अत्यंत वेगाने तपासाची चक्रे फिरवत या गुन्ह्याची उकल केली आहे. याप्रकरणी पोलिसांनी एका आरोपीला अटक केली असून, त्याच्याकडून चोरीची सर्व रक्कम जप्त करण्यात यश मिळवले आहे.
घटनेचा तपशील पोलिसांनी दिलेल्या माहितीनुसार, ही घटना ६ फेब्रुवारी २०२६ रोजी दुपारच्या सुमारास घडली. तक्रारदार व्यापारी बाजारपेठेत असताना एका अज्ञात भामट्याने त्यांची नजर चुकवून १ लाख ९२ हजार ७४० रुपयांची रोकड असलेली बॅग हातोहात लांबवली. चोरीचा हा प्रकार लक्षात येताच व्यापाऱ्याने तात्काळ भुसावळ बाजारपेठ पोलीस ठाण्यात धाव घेतली आणि गुन्हा दाखल केला.भरदिवसा घडलेल्या या घटनेमुळे व्यापारी वर्गात काही काळ चिंतेचे वातावरण होते.
सीसीटीव्ही आणि तांत्रिक तपासाने आरोपी गजाआड गुन्ह्याचे गांभीर्य ओळखून पोलिसांनी तातडीने तपासाला सुरुवात केली. घटनास्थळ आणि आजूबाजूच्या परिसरातील सीसीटीव्ही कॅमेऱ्यांचे फुटेज बारकाईने तपासण्यात आले. तसेच तांत्रिक माहितीच्या आधारे पोलिसांनी संशयिताचा माग काढला. या तपासादरम्यान एका संशयिताला ताब्यात घेऊन त्याची कसून चौकशी केली असता, त्याने या चोरीची कबुली दिली. पोलिसांनी त्याच्याकडून चोरीस गेलेली १ लाख ९२ हजार ७४० रुपयांची संपूर्ण रोकड जप्त केली आहे.
या पथकाने केली कारवाई ही धडक कारवाई जळगाव जिल्ह्याचे पोलीस अधीक्षक डॉ. महेश्वर रेड्डी आणि अपर पोलीस अधीक्षक अशोक नखाते यांच्या मार्गदर्शनाखाली करण्यात आली. स्थानिक गुन्हे शाखेचे पोलीस निरीक्षक राहुल गायकवाड यांच्या नेतृत्वाखालील पथकाने ही कामगिरी फत्ते केली. या पथकामध्ये पोलीस उपनिरीक्षक शरद बागल, अंमलदार रवी नरवाडे, गोपाल गव्हाळे, उमाकांत पाटील, विकास सातदिवे, प्रशांत परदेशी, राहुल वानखेडे आणि पोलीस वाहन चालक प्रमोद ठाकूर यांचा सहभाग होता. याप्रकरणी पोलीस पुढील तपास करत आहेत.
