सण-उत्सव शांततेत पार पडण्यासाठी वणी पोलीसांकडून शांतता समिती बैठकीचे आयोजन!

नवरात्री दुर्गा विसर्जन मिरवणूक ही पारंपरिक पद्धतीने काढून, डीजे(DJ) चा वापर टाळावा, तसेच पारंपरिक वाद्यांचा उपयोग करण्याचे सुचवण्यात आले..

पोलीस वार्ता, वणी : शहर परिसरात आगामी सण-उत्सवांमध्ये कायदा व सुव्यवस्था अबाधित राखण्यासाठी व सर्व सण शांततेत पार पडण्याच्या उद्देशाने वणी पोलीसांनी दि.20 सप्टेंबर 2025 रोजी, सकाळी 11 वाजता नवरात्र उत्सव पार्श्वभूमीवर मंडळांचे पदाधिकारी व सदस्य तसेच सामाजिक, राजकीय नेते व नागरिकांसाठी शांतता समितीच्या बैठकीचे आयोजन केले होते.

वणी पोलीस ठाण्याचे पोनि श्री गोपाल सुधाकर उंबरकर साहेब यांच्या मार्गदर्शनात ही बैठक संपन्न झाली. यावेळी नवरात्री दुर्गा विसर्जन मिरवणूक ही पारंपरिक पद्धतीने काढून, डीजे(DJ) चा वापर टाळावा, तसेच पारंपरिक वाद्यांचा उपयोग करण्याचे सुचवण्यात आले.

बैठकीतील महत्वाचे मुद्दे

• दुर्गा विसर्जन मिरवणुकीत मंडळाच्या जास्तीत जास्त स्वयंसेवकांनी सहभाग घ्यावा.

• मिरवणुकीत कोणीही नशेत किंवा मद्यपान करून सहभागी होऊ नये.

• दिलेल्या मार्गाचे (Route) आणि वेळेचे तंतोतंत पालन करावे.

• विसर्जन घाटावर देवीचे विसर्जन करताना कोणताही अनुचित प्रकार घडू नये याची दक्षता घ्यावी.

• प्रत्येक दुर्गा मंडळाने नवरात्री उत्सवात मंडपात एक स्वयंसेवक पूर्णवेळ हजर ठेवावा.

• नवरात्री उत्सवात कोणत्याही मंडळाने आक्षेपार्ह पोस्टर किंवा बॅनर लावू नये.

या शिवाय बैठकीत, गावातील सर्व कार्यक्रम शांततेत पूर्ण संपन्न होण्यासाठी नागरिकांनी पोलीसांना सहकार्य करावे, तसेच सर्व दुर्गा मंडळ सदस्यांनी डीजे. मुक्त मिरवणुका काढून विसर्जन शांततेत पूर्ण करावे. असे आवाहन उपस्थित मान्यवरांकडून करण्यात आले. वणी पोलीस ठाण्यात आयोजित या बैठकीसाठी सुमारे 170 ते 175 नागरिक उपस्थित होते.

✍️पोलीस वार्ता टीम : दिवाकर साखरकर, वणी (यवतमाळ)