‘राष्ट्रीय क्रीडा दिना’निमित्त नाशिकमध्ये तीन दिवसीय कार्यक्रमांचे आयोजन!

जिल्ह्यातील सर्व खेळाडू, प्रशिक्षक, क्रीडा शिक्षक, क्रीडा प्रतिनिधी व क्रीडाप्रेमींनी सहभागी व्हावे..

पोलीस वार्ता, नाशिक : हॉकीचे जादूगर म्हणून प्रसिद्ध असलेले मेजर ध्यानचंद सिंग यांच्या जयंतीनिमित्त साजरा केल्या जाणाऱ्या ‘राष्ट्रीय क्रीडा दिना’निमित्त 29 ते 31 ऑगस्ट 2025 या कालावधीत विविध कार्यक्रमांचे आयोजन नाशिक जिल्हा क्रीडा अधिकारी कार्यालय यांच्या वतीने करण्यात आले आहे.

या दिवसीय ‘राष्ट्रीय क्रीडा दिन’ कार्यक्रमात जिल्ह्यातील सर्व खेळाडू, प्रशिक्षक, क्रीडा शिक्षक, क्रीडा प्रतिनिधी व क्रीडाप्रेमींनी सहभागी व्हावे असे जिल्हा क्रीडा अधिकारी सुनंदा पाटील यांनी 28 ऑगस्ट रोजी प्रसिद्धी पत्रकाद्वारे आवाहन केले आहे.

कार्यक्रमाचे आयोजन शुक्रवार दि.29 ऑगस्ट 2025 रोजी रावसाहेब थोरात सभागृह, गंगापूर रोड, नाशिक येथे सायंकाळी 4 वाजता केले आहे. यावेळी आंतरराष्ट्रीय व राष्ट्रीय स्तरावर पदक विजेत्या खेळाडूंचा सत्कार करण्यात येणार आहे. तसेच 30 ऑगस्टला नाशिक जिल्ह्यातील क्रीडा शिक्षक, क्रीडा प्रतिनिधी, प्रशिक्षक व खेळाडूंसाठी खेळाशी संबंधित विविध विषयांवर सकाळी 10 वाजता चर्चासत्रा होणार आहे. तर 31 ऑगस्टला सकाळी 7 वाजता रॅलीचे आयोजन करण्यात आले असून या रॅलीत जिल्ह्यातील सर्व सायकलिस्ट सहभागी होणार आहेत. रॅलीची सुरवात अनंत कान्हेरे मैदान येथून होऊन ए.बी.बी सर्कल- जहान सर्कल- गंगापूर रोड मार्गे अशोक स्तंभ- त्र्यंबक नाका सिग्नल- गोल्फ क्लब मैदान याप्रमाणे रॅली मार्गस्त होणार आहे.