नवी दिल्ली:
दिल्लीचे माजी मुख्यमंत्री अरविंद केजरीवाल यांच्या अडचणी वाढल्या आहेत. दिल्ली दारू घोटाळ्याशी संबंधित कथित मनी लॉन्ड्रिंग प्रकरणात अरविंद केजरीवाल यांच्यावर खटला चालवण्यास नायब राज्यपाल व्हीके सक्सेना यांनी ईडीला मंजुरी दिली आहे. ईडीने या प्रकरणात केजरीवाल यांना मास्टरमाईंड म्हटले होते. ईडीने 21 मार्च रोजी दिल्लीचे तत्कालीन मुख्यमंत्री अरविंद केजरीवाल यांना अटक केली होती आणि मे महिन्यात त्यांच्या, पक्ष आणि इतरांविरुद्ध आरोपपत्र दाखल केले होते.
मध्य प्रदेशात भीषण अपघात
मध्य प्रदेशातील देवास-नयापुरा येथे आज सकाळी एका घराला भीषण आग लागली. या अपघातात गुदमरून चार जणांचा मृत्यू झाला आहे. मृत व्यक्ती एकाच कुटुंबातील असल्याचे सांगण्यात येत आहे. या अपघातात पती, पत्नी आणि दोन मुलांचा मृत्यू झाला. आगीवर नियंत्रण मिळवण्यासाठी अग्निशमन दलाच्या गाड्या घटनास्थळी हजर आहेत.
नेपाळमध्ये भूकंपाचे धक्के
नेपाळमध्ये शनिवारी भूकंपाचे जोरदार धक्के जाणवले. नॅशनल सिस्मॉलॉजिकल सेंटरनुसार, नेपाळमध्ये शनिवारी पहाटे 03:59 वाजता भूकंप झाला. भूकंपाची तीव्रता रिश्टर स्केलवर 4.8 इतकी होती. मात्र, भूकंपामुळे अद्याप कोणतीही जीवित किंवा वित्तहानी झाल्याचे वृत्त नाही.
