आपल्या परिसरात असलेला ऐतिहासिक ठेवा मूल्यवान आहे. हा ठेवा आपल्याला, तसेच नव्या पिढीला समजल्यानंतरच त्याचे जतन व संवर्धन होईल
पोलीस वार्ता, बारामती : पणदरे, बारामती येथे रविवारी 2 फेब्रुवारी रोजी हेरिटेज वॉकचे आयोजन करण्यात आले होते. सदर कार्यक्रमास इतिहास अभ्यासक डॉ. राहुल देशपांडे सर यांचे मार्गर्शन लाभले. कन्हा आणि निरा नद्यांच्या खोऱ्यात आढळणारा इतिहास हा भूतकालीन वैभवाचा साक्षीदार असून प्रत्येकाने आपला गाव, गावातील विविध मंदिरे, पुरातत्त्वीय अवशेष, शिलालेख जाणून घेतले पाहिजेत, ते जपले पाहिजेत व नव्या पिढीत झिरपण्यासाठी प्रयत्न केले पाहिजेत, असे आवाहन इतिहास अभ्यासक डॉ. राहुल देशपांडे यांनी यावेळी केले.
पणदरे या गावाला असणारा ऐतिहासिक वारसा उलगडताना डॉ. देशपांडे यांनी श्री भैरवनाथ मंदिर, चतुर्भुज वीरगळ, श्री सिद्धेश्वर मंदिर, श्री रेणक्काई मंदिर, श्री गजलक्ष्मी व पारावरील देवता यांची माहिती दिली.
आपल्या परिसरात असलेला ऐतिहासिक ठेवा मूल्यवान आहे. हा ठेवा आपल्याला, तसेच नव्या पिढीला समजल्यानंतरच त्याचे जतन व संवर्धन होईल, गावातील विविध गोष्टींचा ऐतिहासिक दृष्टीने उलगडा झाल्याने, तसेच विद्यार्थ्यामध्ये जागृती होत असल्याने ग्रामस्थांनी आनंद व्यक्त केला. दरम्यान, गावाला लाभलेला सांस्कृतिक वारसा जपण्यासाठीच प्रतिबिंबच्या माध्यमातून हेरिटेज वॉक’चे आयोजन करण्यात आले असल्याची माहिती मनोज कुंभार व विनीद खटके यांनी दिली.
