भुसावळ – शहरातील वाल्मीक नगर परिसरात कौटुंबिक वादातून मुलानेच वडिलांवर लोखंडी पाइपने हल्ला केल्याची धक्कादायक घटना सोमवारी (ता. १९) दुपारी घडली. या प्रकरणी आईनेच मुलाविरोधात बाजारपेठ पोलीस ठाण्यात फिर्याद दिली असून जखमी वडिलांवर खासगी रुग्णालयात उपचार सुरू आहेत.
याबाबत हेमलता गोपाल निदाने (वय ४८, रा. वाल्मीक नगर, ३ नंबर पोलीस चौकीसमोर, भुसावळ) यांनी दिलेल्या फिर्यादीनुसार, त्यांचे पती गोपाल राजू निदाने हे नगरपालिकेच्या कचरा गाडीवर काम करून कुटुंबाचा उदरनिर्वाह करतात. सोमवारी दुपारी साडेबारा वाजेच्या सुमारास ते नाश्ता घेण्यासाठी घराजवळील लकी किराणा दुकानाकडे पायी जात होते.
त्यावेळी त्यांचा मुलगा निलेश गोपाल निदाने (वय २४) हा घरातून लोखंडी पाइप घेऊन त्यांच्या मागोमाग गेला. संशय आल्याने हेमलता निदाने या देखील मुलाच्या मागे गेल्या. लकी किराणा दुकानाजवळ पोहोचताच निलेश याने कोणतेही कारण नसताना वडील गोपाल निदाने यांच्या डोक्यात लोखंडी पाइपने जोरदार वार केला. तसेच चापटाबुक्क्यांनी मारहाण केल्याचे फिर्यादीत नमूद आहे.
मारहाणीवेळी गोपाल निदाने यांनी “तु मला का मारत आहेस?” असा जाब विचारला असता, “मी तुला आणि माझ्या आईला जिवे मारून टाकेन,” अशी धमकी देत आरोपी तेथून पसार झाला.
हल्ल्यात गोपाल निदाने यांच्या डोक्याला गंभीर दुखापत झाली असून रक्तस्त्राव सुरू झाल्याने नातेवाईक राकेश भारत डागोर यांनी रिक्षाने त्यांना गोल्डन अवर हॉस्पिटलमध्ये उपचारासाठी दाखल केले. या प्रकरणी भुसावळ शहर पोलीस ठाण्यात गुन्हा दाखल करण्याची प्रक्रिया सुरू होती.
