उंब्रज | प्रतिनिधी । कराड तालुक्यातील वडोली भिकेश्वर गावाच्या हद्दीत कृष्णा नदीच्या पात्रात सुमारे ८ ते ९ वर्षांच्या अज्ञात मुलाचा मृतदेह आढळून आल्याने परिसरात खळबळ उडाली आहे. ही घटना बुधवारी सकाळी आठ वाजण्याच्या सुमारास उघडकीस आली.
स्थानिक नागरिकांना नदीवरील पुलाजवळ पाण्यावर मृतदेह तरंगताना दिसताच त्यांनी तत्काळ पोलिसांना माहिती दिली.यानंतर उंब्रज व मसूर पोलीस घटनास्थळी दाखल झाले. बोटीच्या साहाय्याने मृतदेह बाहेर काढण्यात आला.
मात्र, मृत मुलाची ओळख अद्याप पटलेली नसल्याने घटनेभोवती गूढ निर्माण झाले आहे. मुलाचा मृत्यू पाण्यात बुडून झाला की त्यामागे घातपात आहे, हे अद्याप स्पष्ट झालेले नाही. पोलिसांनी सांगितले की, मुलाची ओळख पटल्यावरच या प्रकरणाचा नेमका उलगडा होऊ शकतो.
या घटनेची नोंद मसूर पोलीस ठाण्यात करण्यात आली असून सर्व पातळीवर तपास सुरू आहे. मृत मुलाची ओळख पटवण्यासाठी पोलिसांकडून सोशल मीडियाचा देखील वापर केला जात आहे.दरम्यान, या मुलाबाबत कोणाला काही माहिती असल्यास तात्काळ मसूर पोलीस ठाण्याशी संपर्क साधण्याचे आवाहन पोलिसांनी केले आहे.
