रामानंद नगर एमडी प्रकरणात स्थानिक गुन्हे शाखेचा मोठा खुलासा; आरोपीला अडकवून खंडणी मागण्याचा होता डाव..
पोलीस वार्ता जळगाव | शहरातील रामानंद नगर पोलीस ठाण्याच्या हद्दीत एमडी (मेफेड्रोन) ड्रग्ज प्रकरणात तपास करत असतांना स्थानिक गुन्हे शाखेने धक्कादायक कटाचा पर्दाफाश केला आहे. अटक करण्यात आलेल्या तरुणाला त्याच्याच एका नातेवाईकाने जाणीवपूर्वक ड्रग्ज प्रकरणात अडकवून त्याच्या कुटुंबाकडून खंडणी मागण्याचा कट रचल्याचे तपासात निष्पन्न झाले आहे. या प्रकरणातील मुख्य सूत्रधार आरोपी जतीन रविंद्र सैंदाणे आणि एमडी ड्रग्ज पुरवठादार आरोपी चेतन दत्तात्रय वानखेडे ऊर्फ चंदू सोनार या दोघांना पोलीसांनी अटक केली असून दि.31 जुलै रोजी न्यायालयात हजर केले असता त्यांना दि.5 ऑगस्टपर्यंत पोलीस कोठडी सुनावण्यात आली आहे.
सविस्तर माहितीनुसार रामानंद नगर पोलीस ठाणे हद्दीतील शिव कॉलनी परिसरात दि.29 जुलै रोजी पोलीसांनी कल्पेश सतीष रायसिंग (वय-26 वर्षे, रा. वालकी, ता.चोपडा) याला मेफेड्रोन (एमडी) या अंमली पदार्थासह अटक केली होती. या प्रकरणी एन्टीपीएस कायद्यानुसार गुन्हा दाखल करण्यात आला होता. या गुन्ह्याचा पुढील तपास करण्याचे आदेश जळगाव पोलीस अधीक्षकांनी स्थानिक गुन्हे शोध पथकाला दिले होते.
सदर तपासादरम्यान अटकेत असलेल्या आरोपी कल्पेश रायसिंग याने पोलिसांना सांगितले की, त्याचा नातेवाईक जतीन सैंदाणे याने वारंवार जळगाव येथे जेवणासाठी येण्याचा आग्रह केला होता. त्याच्या आग्रहावरून तो जळगावला आला असताना पोलिसांनी त्याला अडवून मोटारसायकलच्या सीटखालून एमडी पावडर जप्त केली. मात्र ही पावडर आपल्या गाडीत कशी आली याची कोणतीही माहिती नसल्याचे त्याने सांगितले.
स्थानिक गुन्हे शाखेने तांत्रिक विश्लेषण, गोपनीय माहिती आणि चौकशीच्या आधारे तपासाची दिशा बदलली. तपासात जतीन सैंदाणे हा शेअर मार्केटमध्ये मोठे आर्थिक नुकसान झाल्याने कर्जबाजारी झाल्याचे तसेच त्याला एमडी ड्रग्जचे व्यसन असल्याचे निष्पन्न झाले. संशय बळावल्यानंतर त्याची कसून चौकशी करण्यात आली असता त्याने धक्कादायक कबुली दिली.
