1 किलो 963 ग्रॅम इफेड्रीन अंमली पदार्थ व 2 किलो 114 ग्रॅम गांजा जळगाव पोलिसांनी केला हस्तगत.. 
पोलीस वार्ता, जळगाव | अंमली पदार्थांची तस्करी व विक्रीला आळा घालण्यासाठी जळगाव स्थानिक पोलीस गुन्हे शाखा (LCB) आणि एमआयडीसी पोलिसांच्या संयुक्त पथकाने कारवाई करत तब्बल 11 लाख 17 हजार 200 रुपयांचा अंमली पदार्थांचा मुद्देमाल जप्त केला आहे. यात इफेड्रीन व गांजासह एक सुझुकी बर्गमन दुचाकीचा समावेश आहे. या कारवाईत एका संशयितास पोलिसांनी ताब्यात घेतले आहे.
पोलिसांनी दिलेली माहिती अशी की, जळगाव शहरातील नारायणवाला बाबा दर्ग्यासमोरील रोडवर इफेड्रीन या अंमली पदार्थाची विक्री करण्यासाठी संशयित येणार असल्याची माहिती पोलिसांना मिळाली होती. त्यानुसार पोलिसांनी सापळा रचून संशयित आरोपी नूर मोहम्मद अब्दुल सलाम पटेल, वय-55 वर्षे, रा. रामनगर, मेहरूण, जळगाव याला ताब्यात घेतले. त्याच्याकडील दुचाकी झडती घेतली असता डिक्कीत अंमली पदार्थ आढळून आले.
पोलिसांनी केलेल्या कारवाईत 9 लाख 81 हजार 500 रुपये किंमतीचे 1 किलो 963 ग्रॅम इफेड्रीन पावडर, 1 लाख 5 हजार 700 रुपये किंमतीचा 2 किलो 114 ग्रॅम गांजा आणि 30 हजार रुपये किंमतीची दुचाकी असा मुद्देमाल जप्त करण्यात आला आहे. प्राथमिक फॉरेन्सिक तपासणीत जप्त पदार्थ इफेड्रीन व गांजा असल्याचे निष्पन्न झाले आहे. या प्रकरणी एमआयडीसी पोलिस ठाण्यात गु.र.क्र. 0704/2026 अन्वये एनडीपीएस कायदा 1985 मधील कलम 9(अ), 25(अ), 8(क) सह 20(ब)(ii) प्रमाणे गुन्हा दाखल करण्यात आला आहे. आणि पुढील तपास पोलिसांकडून सुरू आहे.
