पिंपळगाव हरेश्वर (प्रतिनिधी) : बहुळा नदीच्या काठावर सुरू असलेल्या जुगार अड्ड्यावर पिंपळगाव हरेश्वर पोलिसांनी छापा टाकत सहा जणांना ताब्यात घेतले. त्यांच्या ताब्यातून रोख रक्कम व जुगार साहित्य असा एकूण सुमारे १ लाख ५६ हजार ४८० रुपयांचा मुद्देमाल जप्त करण्यात आला आहे.
पोलीस निरीक्षक कल्याणी वर्मा यांना मिळालेल्या गुप्त माहितीनुसार ही कारवाई करण्यात आली. पोलिस पथकाने खात्री करून संबंधित ठिकाणी छापा टाकला असता सहा इसम जुगार खेळताना आढळून आले. त्यांच्याविरुद्ध महाराष्ट्र जुगार कायदा कलम १२(अ) अन्वये गुन्हा दाखल करण्यात आला आहे.
ही कारवाई पोलिस अधीक्षक महेश्वर रेड्डी यांच्या आदेशाने, अप्पर पोलिस अधीक्षक कविता नेरकर, उपविभागीय पोलिस अधिकारी बापू रोहम यांच्या मार्गदर्शनाखाली पिंपळगाव हरेश्वर पोलिस स्टेशनच्या पथकाने केली. पुढील तपास सुरू आहे.
