गुंतवणुकीवर आकर्षक परताव्याचे आमिष दाखवून फसवणूक; बाजारपेठ पोलिसांकडून तुषार शिंदे याला अटक
भुसावळ : सोनी इन्व्हेस्टमेंट कंपनीमार्फत लाखो रुपयांच्या गुंतवणुकीवर आकर्षक परतावा मिळवून देण्याचे आमिष दाखवून फसवणूक केल्याप्रकरणी तब्बल १८ वर्षांपासून फरार असलेल्या आरोपी तुषार विजय शिंदे याचा जामीन अर्ज भुसावळ येथील प्रथम वर्ग न्यायदंडाधिकारी न्यायालयाने फेटाळून लावला. न्यायालयाने २८ ऑगस्ट रोजी हा निर्णय दिला.
भुसावळ बाजारपेठ पोलिस ठाण्यात गुन्हा क्रमांक ९३/२००७ अन्वये भारतीय दंड संहितेच्या कलम ४२० नुसार हा गुन्हा दाखल करण्यात आला होता. फिर्यादी वर्षा मकरंद चौधरी यांना आरोपीने सोनी इन्व्हेस्टमेंटच्या योजनेत तीन लाख रुपयांची गुंतवणूक केल्यास आकर्षक परतावा मिळेल, असे आमिष दाखविल्याचा आरोप आहे. त्यानंतर गुंतविलेली रक्कम तसेच अपेक्षित परतावा न मिळाल्याने फसवणूक झाल्याचे लक्षात आल्यानंतर त्यांनी पोलिसांत तक्रार दाखल केली होती.
गुन्हा दाखल झाल्यानंतर आरोपी तुषार शिंदे हा पोलिसांना तब्बल १८ वर्षे गुंगारा देत फरार होता. बाजारपेठ पोलिसांनी शोध घेऊन अखेर त्याला अटक केली. १९ ऑगस्ट २०२६ रोजी त्याला न्यायालयात हजर केले असता दोन दिवसांची पोलिस कोठडी सुनावण्यात आली. त्यानंतर २१ ऑगस्ट रोजी त्याची न्यायालयीन कोठडीत रवानगी करण्यात आली.
दरम्यान, आरोपीच्या वतीने जामिनासाठी अर्ज दाखल करण्यात आला. या अर्जाला मूळ फिर्यादीच्या वतीने अॅड. विनोद तायडे यांनी, तर सरकारच्या वतीने सरकारी वकील पावरा यांनी जोरदार विरोध केला. आरोपी दीर्घकाळ फरार राहिल्याने त्याच्याकडून पुराव्यांमध्ये छेडछाड होण्याची अथवा पुन्हा फरार होण्याची शक्यता असल्याचा युक्तिवाद करण्यात आला.
अॅड. तायडे यांनी सर्वोच्च न्यायालयाच्या संबंधित न्यायनिर्णयाचा आधार घेत गुन्ह्याचे गांभीर्य आणि आरोपीचा प्रदीर्घ काळ फरार राहण्याचा इतिहास न्यायालयाच्या निदर्शनास आणून दिला. दोन्ही बाजूंचा युक्तिवाद ऐकल्यानंतर प्रथम वर्ग न्यायदंडाधिकारी ए. एम. बगे यांनी २८ ऑगस्ट रोजी आरोपी तुषार विजय शिंदे याचा जामीन अर्ज फेटाळला.
या निर्णयामुळे दीर्घकाळ कायद्याच्या प्रक्रियेपासून दूर राहिलेल्या आरोपीला जामीन मिळू नये, यासाठी फिर्यादी पक्षाने घेतलेल्या कायदेशीर भूमिकेला यश मिळाले आहे.
