नाशिक जिल्ह्यात गॅस सिलिंडरचा पुरवठा सुरळीत असून कोणतीही टंचाई नाही!

नागरिकांनी कुठल्याही अफवा पसरवू नये तसेच अफवांवर विश्वास ठेवू नये, असे आवाहन नाशिकचे जिल्हाधिकारी आयुष प्रसाद यांनी केले..

पोलीस वार्ता, नाशिक : आंतरराष्ट्रीय स्तरावर अमेरिका–इराण यांच्यात चाललेल्या युद्धामुळे भारतात काही राज्यांमध्ये स्वयंपाकाच्या गॅस सिलिंडरच्या टंचाईबाबत अफवा पसरवली जात आहे. परंतु नाशिक जिल्ह्यात घरगुती वापराच्या गॅस सिलिंडरचा पुरेसा साठा उपलब्ध असून नागरिकांनी कुठल्याही अफवा पसरवू नये तसेच अफवांवर विश्वास ठेवू नये, असे आवाहन नाशिकचे जिल्हाधिकारी आयुष प्रसाद यांनी केले आहे.

नाशिक जिल्ह्यात सध्या स्वयंपाकाच्या गॅस सिलिंडरचा पुरवठा सुरळीत असून कोणतीही टंचाई नाही. गॅस पुरवठा कंपन्यांच्या प्रतिनिधींसोबत संपर्कात आहोत. जिल्ह्यातील गॅस वितरण व साठा याबाबत आढावा घेतला आहे. नागरिकांना नियमित आणि अखंडित गॅस पुरवठा सुनिश्चित करण्याच्या सूचना देण्यात आल्या आहेत. तसेच गॅस सिलिंडरचा साठा करून कृत्रिम टंचाई निर्माण करणे किंवा काळाबाजार करण्याचा प्रयत्न केल्यास संबंधितांवर कडक कायदेशीर कारवाई करण्यात येईल, असा इशाराही जिल्हाधिकाऱ्यांनी दिला आहे. नागरिकांनी घाबरून अनावश्यक गॅस सिलिंडर साठवू नयेत, असे देखील जिल्हाधिकारी यांनी म्हटले आहे.