भुसावळ – शहरातील माजी नगरसेवक रवी सपकाळे यांनी राष्ट्रवादी काँग्रेस अजित पवार गटाच्या सामाजिक न्याय विभागाच्या रावेर लोकसभा जिल्हाध्यक्षपदाचा राजीनामा प्रदेशाध्यक्ष सुनील मगरे यांना दिल्याने भुसावळातील राष्ट्रवादी काँग्रेस अजित पवार गटाला मोठे खिंडार पडले आहे.
राष्ट्रवादी काँग्रेस अजित पवार गटाचे जळगाव जिल्हाध्यक्ष उमेश नेमाडे, आणि शहराध्यक्ष संतोष चौधरी (दाढी ) यांच्याकडून अपमानास्पद वागणूक दिली जात असल्याचा आरोप रवींद्र सपकाळे यांनी केला आहे.
माजी नगरसेवक नितीन धांडे यांनी महायुतीत येण्यास खूप उशीर केला असल्याचे मंत्री संजय सावकारे यांनी म्हटलेलं आहे.तसेच माझ्या प्रभागात विकासकामे करण्यासाठी मला निधी उपलब्ध करून दिला जात नाही.त्यामुळे मी राजीनामा देत असल्याचा दावा रवींद्र सपकाळे यांनी केलेला आहे.तसेच आगामी भुसावळ नगरपरिषदेची निवडणूक ही भाजप विरुद्ध माजी आमदार संतोष चौधरी अशीच ही थेट लढत राहणार आहे.माजी आमदार संतोष चौधरी यांच्या वाढदिवसानिमित्त आमचे सामाजिक न्याय विभागाचे समर्थक आणि सहा तालुक्यांचे तालुकाध्यक्ष यांचेसह कार्यकर्ते राष्ट्रवादी काँग्रेस शरदचंद्र पवार गटात प्रवेश करणार आहे आणी यापुढे फक्त संतोष चौधरी यांच्यासोबतच राहून कायमस्वरूपी काम करणार असल्याचे रवींद्र सपकाळे यांनी सांगितले आहे.
नगराध्यक्षपद SC राखीव राहण्याची शक्यता ?
भुसावळ विधानसभा मतदारसंघ हा अनुसूचित जातीसाठी राखीव असून आता आगामी येणाऱ्या निवडणुकांमध्ये भुसावळचे लोकनियुक्त नगराध्यक्ष पद देखील अनुसूचित जातीसाठी राखीव राहण्याची शक्यता वर्तवली जात आहे. त्यादृष्टीने आता भुसावळ शहरातील अनुसूचित जातीच्या माजी नगरसेवकांनी गुडघ्याला बाशिंग बांधून निवडणुकीच्या वातावरणाची तयारी सुरु केलेली असून आता नगरपरिषद निवडणुकीचा धुराळा उडाल्याचे दिसून येत आहे.
