मा. जिल्हा व सत्र न्यायालयाचा निर्णय; पीडितांच्या वतीने ठोस युक्तिवाद
भोर (प्रतिनिधी):-संतोष मोहिते । वंचित बहुजन आघाडीचे पुणे शहराध्यक्ष अॅड. अरविंद तायडे यांनी दिलेल्या माहितीनुसार, पुणे जिल्ह्यातील भोर पोलीस स्टेशनचे सहाय्यक पोलीस निरीक्षक (PSI) अनिल चव्हाण यांनी दाखल केलेला अटकपूर्व जामीन अर्ज मा. जिल्हा व सत्र न्यायालयाने नामंजूर केला आहे. हा निर्णय मा. न्यायाधीश एच. के. भालेराव यांनी दिला.
मयूर खुंटे या भीम अनुयायाने कथित मारहाणीनंतर आत्महत्या केल्याच्या प्रकरणात संबंधित अधिकाऱ्याविरुद्ध गुन्हा दाखल करण्यात आला आहे. प्रकरणाचे गांभीर्य, प्राथमिक पुरावे आणि तपास प्रक्रियेची आवश्यकता लक्षात घेऊन न्यायालयाने अटकपूर्व जामीन अर्ज फेटाळल्याची माहिती देण्यात आली.
या प्रकरणात मूळ फिर्यादींच्या वतीने प्रभावीपणे बाजू मांडण्यात आली. ज्येष्ठ विधिज्ञ Balasaheb Ambedkar यांनी कायदेशीर मार्गदर्शन व सहकार्य केल्याचे सांगण्यात आले. त्यांच्या मदतीबद्दल पीडित कुटुंबीयांनी आभार व्यक्त केले आहेत.
न्यायालयाच्या या निर्णयामुळे तपास प्रक्रियेला वेग मिळणार असून, पुढील कायदेशीर कार्यवाहीकडे सर्वांचे लक्ष लागले आहे.
