प्रत्येक तालुकास्तरावर अशा प्रकारची लॅब कार्यान्वित करून नाशिक जिल्हा परिषदेने राबविलेला सुपर 50 उपक्रम राज्यात राबविण्यात येईल..
पोलीस वार्ता, नाशिक : जिल्हा परिषद, नाशिक, शिक्षण विभाग, मालेगाव आणि ग्रामपालिका दाभाडी यांच्या संयुक्त विद्यमाने आज सकाळी जिल्हा परिषदेच्या दाभाडी येथील शाळेत रोबोटिक्स आणि एआय मेकर स्टुडिओचे उद्घाटन मंत्री दादा भुसे यांच्या हस्ते दि.25 जुलै 2025 रोजी करण्यात आले. यावेळी जिल्हा परिषदेच्या मुख्य कार्यकारी अधिकारी आशिमा मित्तल, सरपंच प्रमोद निकम, माध्यमिक विभागाचे शिक्षणाधिकारी प्रवीण पाटील, प्राथमिक विभागाचे शिक्षणाधिकारी भास्कर कनोज, गटविकास अधिकारी चंद्रकांत साबळे, गट शिक्षणाधिकारी नीलेश पाटील आदी उपस्थित होते.
मंत्री दादा भुसे म्हणाले की, प्रत्येक विद्यार्थ्यांमध्ये जिज्ञासा असते. अशा लॅबमुळे विद्यार्थी संशोधनाकडे वळू शकतील. त्याबरोबरच विद्यार्थ्यांच्या विचारशक्तीला कृतिशीलतेची जोड मिळणार आहे. राज्यात सुपर 50 उपक्रम राबविण्याबरोबरच क्रीडा प्रबोधिनीच्या माध्यमातून विद्यार्थ्यांना कौशल्य विकसित करण्याची संधी देण्यात येईल.
या लॅबच्या पाहणीसाठी तालुक्यातील जिल्हा परिषद शाळेचे विद्यार्थी भेट देतील. त्यामुळे दाभाडी ग्रामपंचायतीवरील जबाबदारी वाढली आहे, असेही मंत्री भुसे यांनी सांगितले.
श्रीमती मित्तल म्हणाल्या की, राज्य शासनाने 2047 मध्ये विकसित महाराष्ट्राचे लक्ष्य निश्चित केले आहे. शालेय शिक्षण मंत्री महोदय यांच्या मार्गदर्शनाखाली तयार केलेली ही लॅब उपयुक्त ठरणार आहे. जिल्ह्यात 13 लॅब आहेत. या लॅबमध्ये 9 प्रकारची दालने आहेत.
