सावदा (ता. रावेर) : महिलांना राजकीय व शासकीय क्षेत्रात 33 टक्के आरक्षण मिळावे आणि संसद तसेच विधानसभेमध्ये महिलांची सहभागिता वाढावी या उद्देशाने प्रस्तावित ‘नारीशक्ती वंदन अधिनियम’ विषयक जनजागृतीसाठी सावदा येथे महिलांचा भव्य मेळावा उत्साहात पार पडला.
येथील जहरा मॅरेज हॉलमध्ये शनिवारी (दि. 11) सायंकाळी 4 वाजता या मेळाव्याचे आयोजन करण्यात आले होते. कार्यक्रमास केंद्रीय क्रीडा राज्यमंत्री रक्षाताई खडसे प्रमुख मार्गदर्शक म्हणून उपस्थित होत्या.
आपल्या मार्गदर्शनात त्यांनी महिलांच्या सक्षमीकरणासाठी केंद्र सरकारकडून राबविण्यात येत असलेल्या विविध योजनांची माहिती दिली. तसेच नरेंद्र मोदी यांच्या नेतृत्वाखालील सरकारने ‘नारीशक्ती वंदन अधिनियम’ हा महिलांना राजकीय प्रक्रियेत अधिक संधी उपलब्ध करून देणारा ऐतिहासिक निर्णय असल्याचे सांगितले. महिलांनी पुढाकार घेत राजकारणात सक्रिय सहभाग नोंदवावा, असे आवाहनही त्यांनी यावेळी केले.
कार्यक्रमादरम्यान उपस्थित महिलांनी या कायद्याबाबत आपली मते, सूचना आणि अपेक्षा मांडल्या. संवादातून महिलांच्या सक्षमीकरणासाठी आवश्यक विविध मुद्द्यांवर सखोल चर्चा झाली.
या मेळाव्यास सौ. रजनी सावकारे, डॉ. केतकी पाटील, वैशाली दीदी (ब्रम्हाकुमारी), सौ. मंगला पाटील, योगिता पाटील, ॲड. विद्या सोनार, नगराध्यक्ष सौ. संगिता महाजन, सौ. दामिनी सराफ, सौ. रेणुका पाटील, सौ. संगिता बियाणी, सौ. शैलेजा नारखेडे, सौ. रंजना भारंबे, माजी जि.प. अध्यक्षा सौ. रंजना पाटील, सौ. गोमती बारेला, सौ. संध्या महाजन, सौ. नजमा तडवी, सौ. रेखा बोंडे, सौ. सविता भालेराव यांच्यासह भाजपा महिला मोर्चा पदाधिकारी, कार्यकर्त्या आणि परिसरातील महिला मोठ्या संख्येने उपस्थित होत्या.
