खानावळला मंगळवारी अचानक पहाटे आग लागली. आगीने काही वेळातच रौद्ररूप धारण केल्याने बाजूला असलेल्या सलून दुकानालाही आग लागली..
पोलीस वार्ता, वणी : तालुक्यातील मोहदा येथे मंगळवारी दि.6 मे ला पहाटे 4 वाजताच्या सुमारास एका खानावळला अचानक आग लागली आगीत खानावळ संपूर्ण जळून खाक झाली आहे. या घटनेत कोणतीही जीवितहान झाली नसल्याची माहिती मोहदाचे उपसरपंच सचिन रासेकर यांनी दिली आहे.
सविस्तर वृत्त असे की, वणी, मोहदा बस स्टँड जवळील सुनीता रमेश काळे यांच्या मालकीचे खानावळ आहे. या खानावळला मंगळवारी अचानक पहाटे आग लागली. आगीने काही वेळातच रौद्ररूप धारण केल्याने आग पसरत बाजूला असलेल्या सलून दुकानालाही आग लागली. या घटनेची माहिती मिळताच मोहदा उपसरपंच सचिन रासेकर यांनी बातमीची खात्री करून वणीचे आमदार श्री.संजय देरकर यांना संपूर्ण माहिती दिली. आमदार देरकर यांनी देखील घटनेचे गांभीर्य ओळखून तत्काळ अग्निशमन विभागाला बातमी पोहचवली. आणि अग्निशमन दल लवकरच घटनास्थळी दाखल झाले. आगीवर नियंत्रण मिळवण्यासाठी अग्निशमन दलाला एक ते दीड तासाची कसरत करावी लागली यात त्यांना स्थानिक नागरिकांची देखील मदत मिळाली. सकाळी सहा वाजता आग आटोक्यात आणण्यात यश मिळाले. आगीचं कारण स्पष्ट झाले नसून या घटनेत खानावळ मालक सुनीता रमेश काळे व सलून व्यावसायिक ओमप्रकाश विनोद नक्षीने या दोघांचे मोठं आर्थिक नुकसान झाले आहे.
