भुसावळात व्यावसायिक गॅसचा तुटवडा; हॉटेल व्यवसायिकांवर हॉटेल बंद करण्याची वेळ

भुसावळ शहरात काही गॅस वितरकांनी व्यावसायिक गॅस सिलेंडर देणे बंद केल्याची माहिती हॉटेल व्यावसायिकांनी दिली आहे..

पोलीस वार्ता, भुसावळ : जळगाव जिल्ह्यातील भुसावळ शहरात व्यावसायिक गॅस सिलेंडरचा तुटवडा निर्माण झाल्याने हॉटेल व्यवसायिकांवर मोठे संकट ओढवले आहे. युद्धजन्य परिस्थितीमुळे गॅसचा पुरवठा कमी झाल्याचे कारण देत भुसावळ शहरात काही गॅस वितरकांनी व्यावसायिक गॅस सिलेंडर देणे बंद केल्याची माहिती हॉटेल व्यावसायिकांनी दिली आहे.

हॉटेल व्यवसाय चालवण्यासाठी दररोज नाश्ता, जेवण तयार करण्यासाठी मोठ्या प्रमाणात व्यावसायिक गॅस सिलेंडरची गरज असते. मात्र सध्या शहरात सिलेंडर उपलब्ध होत नसल्याने अनेक हॉटेल चालक अडचणीत सापडले आहेत. गॅस मिळत नसल्यास हॉटेल बंद ठेवण्याची वेळ येत असून काहींना पर्यायी उपाय म्हणून लाकडी कोळशाचा वापर करण्याचा विचार करावा लागत आहे. या परिस्थितीमुळे हॉटेल व्यवसायावर मोठा परिणाम होत असून गॅस पुरवठा तातडीने सुरळीत करावा, अशी मागणी हॉटेल व्यावसायिकांकडून करण्यात येत आहे. अन्यथा येत्या काही दिवसांत भुसावळ शहरात अनेक हॉटेल बंद पडण्याची शक्यता व्यक्त केली जात आहे.