प्रेमविवाहाचा राग मनात धरून तरुणाला खांबाला बांधून, निर्वस्त्र करून मारहाण!

तरुणाने प्रेमविवाह केल्याच्या रागातून नातेवाईकांनी हा अमानुष प्रकार केल्याचे प्राथमिक तपासात समोर..

पोलीस वार्ता, भुसावळ : तालुक्यातील खडका येथे प्रेमविवाह केल्याच्या कारणावरून एका तरुणाला खांबाला बांधून, निर्वस्त्र करून त्याला बेदम मारहाण केल्याची धक्कादायक घटना दि.20 मार्च 2026 रोजी दुपारी घडली आहे. या अमानुष प्रकारामुळे परिसरात मोठी खळबळ उडाली आहे. या प्रकरणात पोलीसांनी मुख्य सूत्रधार असलेल्या यावल तालुक्यातील पाडळसे येथील रहिवासी मनोज पाटील उर्फ गोटू (काका) व रुपाली उर्फ पूनम पाटील (मावशी) यांना अटक केली आहे.

संबंधित तरुणाने प्रेमविवाह केल्याच्या रागातून नातेवाईकांनी हा अमानुष प्रकार केल्याचे प्राथमिक तपासात समोर आले आहे. अटक केलेल्या आरोपींना न्यायालयात हजर केले असता शुक्रवार दि.27 मार्च पर्यंत त्यांना पोलीस कोठडी सुनावण्यात आली आहे. दरम्यान, या घटनेमुळे नागरिकांमध्ये संतापाची लाट उसळली असून दोषींवर कडक कारवाई करण्याची मागणी सर्व स्तरातून होत आहे. अधिक पुढील तपास भुसावळ ग्रामीण पोलिसांकडून सुरू आहे.