लोहमार्ग पोलीस व रेल्वे सुरक्षा बलाच्या संयुक्त कारवाईत 2 लाख 53 हजार 506 रुपयांचा गुटखा जप्त..
पोलीस वार्ता, भुसावळ : महाराष्ट्रात बंदी असलेल्या गुटख्याची रेल्वेमार्गे तस्करी करण्याचा प्रयत्न भुसावळ रेल्वे स्थानकावर उधळून लावण्यात आला. भुसावळ लोहमार्ग पोलीस व रेल्वे सुरक्षा बलाच्या संयुक्त कारवाईत 2 लाख 53 हजार 506 रुपयांचा गुटखा पठाणकोट रेल्वे एक्सप्रेसमधून जप्त करण्यात आला आहे. यावेळी कारवाईत महेश शिवनारायण मालाकार, रा- शिवाजी नगर, लालबाग, बऱ्हाणपूर, मध्यप्रदेश असे अटक केलेल्या आरोपीचे नाव आहे.
सोमवारी, दि.23 मार्च 2026 रोजी रेल्वे सुरक्षा बल पथकाला गुप्त माहिती मिळाली होती की, पठाणकोट एक्सप्रेस गाडी क्र.11058 (अप) मधून गुटखा सदृश्य तंबाखू माल आणला जात आहे. या माहितीच्या आधारे सायंकाळी सुमारे सहा वाजता पठाणकोट रेल्वे गाडी भुसावळ रेल्वे स्थानकाच्या प्लॅटफॉर्म क्र- 4 वर दाखल होताच रेल्वे पोलिसांकडून डब्यांची तपासणी सुरू झाली. तपासणीदरम्यान जनरल कोचमध्ये एका संशयित इसमाकडे एकूण 17 बॅग सापडल्या. या बॅगची झडती घेतली असता त्यामध्ये महाराष्ट्रात बंदी असलेला गुटखा माल आढळून आला.
