भुसावळ | प्रतिनिधी कंडारी (ता. भुसावळ) येथील सार्वजनिक महिलांचे शौचालय कोणतीही अधिकृत परवानगी न घेता तोडण्यात आल्याचा गंभीर प्रकार समोर आला आहे. या प्रकरणी संबंधितांवर तातडीने कारवाई करण्यात यावी, अन्यथा आंदोलन छेडण्यात येईल, असा इशारा देण्यात आला आहे.
याबाबत ‘भीम आर्मी’चे तालुका सचिव प्रदीप जनार्दन मोरे यांनी सार्वजनिक बांधकाम उपविभाग, भुसावळ येथील उपअभियंत्यांकडे लेखी तक्रार अर्ज सादर केला आहे. अर्जात नमूद केल्याप्रमाणे, कंडारी ग्रामपंचायतीमार्फत सन २०१८ ते २०१९ दरम्यान महिलांसाठी सार्वजनिक शौचालयाची उभारणी करण्यात आली होती. मात्र अलीकडेच कोणतीही शासकीय परवानगी न घेता संबंधित शौचालय पाडण्यात आले आहे.
शौचालय पाडल्यानंतर त्या जागी मोठ्या प्रमाणात काटेरी झुडपे वाढले असून महिलांना उघड्यावर शौचास बसावे लागत आहे. त्यामुळे साप, विंचू यांसारख्या विषारी प्राण्यांचा धोका निर्माण झाला असून महिलांच्या सुरक्षेचा प्रश्न ऐरणीवर आला आहे. एखादी दुर्घटना घडल्यास त्याची जबाबदारी कोण घेणार, असा सवालही अर्जात उपस्थित करण्यात आला आहे.
या प्रकरणाची चौकशी करून जबाबदार व्यक्तींवर कारवाई करण्यात यावी व तात्काळ महिलांसाठी पर्यायी व्यवस्था करावी, अशी मागणी करण्यात आली आहे. मागण्या मान्य न झाल्यास सार्वजनिक बांधकाम विभागाच्या कार्यालयासमोर आंदोलन करून उपोषणाचा मार्ग अवलंबला जाईल, असा इशाराही देण्यात आला आहे.
